للمبتدئين: تعليمات مهمة لتربية الفينج (زيبرا, جولديان, الخ..) بسم الله الرحمن الرحيم
السلام عليكم ورحمة الله وبركاته
اخواني حبيت اعرض لكم بعض التعليمات اللي بتفيد كل شخص مبتدئ
عشان يبدأ هذي التجربة الشيقة بشكل صحيح و ما يعرض طيوره
لمشاكل كان ممكن يتفاداها بسهولة.
اولاً -
توفير القفص المناسب لطيورك...طبعاً في الامارات الجو عندنا ما يساعد اننا نربي عصافير الفينج خارج
المنزل - بعض اصحاب الخبرة استطاعوا لكن مع هذا يواجهون مصاعب
كثيرة لأن الفينج غير مهيأ للحرارة - فالإختيار الوحيد هو تربيتها داخل
المنزل.
لازم تختار القفص المناسب و يكون عرضه لا يقل عن 65 سم للجوز اذا
كنت تنوي انتاجهم, اذا لا بامكانك تربي جوزين من الانواع المسالمة (مثل
الجولديان) او ثلاثة اجواز من الانواع المزاجية (مثل
الزيبرا) لكن اذا اكثر
من زوجين فهذا يتطلب قفص بحجم أكبر.
تذكر ان الفينج ما يهتم بإرتفاع القفص - عكس البادجي و الببغاوات اللي
تحتاج ارتفاع للتسلق. الفينج يطير بشكل افقي, ليس عمودي. لهالسبب و
انت تشتري الأفضل انك تختار أعرض قفص ممكن بدل من أطول
قفص و مثل ما سبق و ذكرت - العرض لا يقل عن 65 سم و ارتفاعه لا يقل عن 30 سم.
[url=https://2img.net/r/ihimizer/img48/4952/cagesoa2.jpg][/url]
تقدر لو حبيت تستعين بنجار لتنفيذ قفص أوسع و مناسب لاحتياجاتك و
اكيد سعره بيكون ارخص من الأقفاص الجاهزة, هذا مثال على قفص من
الشبك بسيط لكن ممتاز لتربية الفينج:
[url=https://2img.net/r/ihimizer/img48/9030/cage1go8.jpg][/url]
ثانياً -
مشاكل تغيير الجو و التكييف...اكيد أغلبكم لاحظ احياناً بعد ما تشتري زيبرا او اي من انواع الفينج تلقاه
نافش ريشه و مريض او احياناً ميت, السبب طبعاً هو المكيفات و تغيير الجو.
عشان نتفادى هالمشكلة لازم و احنا في المحل نلاحظ حرارة الجو اللي
كانت عايشة فيه الطيور, اذا كان حار فأول ما ترجع البيت لازم تحط القفص
في غرفة مسكر فيها المكيف. اختار غرفة قليل استخدامها عشان ما
يدخل شخص بعدك و يفتح المكيف خلال غيابك.
ثاني يوم افتح المكيف لكن حطه على ادفأ اختيار و تيار الهوا على الـlow
و تحط القفص في زاوية ما يضرب عليها التكييف.
كل يوم ارفع برودة المكيف درجتين في الصباح و درجتين في المساء
لين ما توصل درجة البرودة للي متعودين عليه في البيت و بهالشكل العصافير بتتأقلم 100%.
هذي طريقة جربتها شخصياً مع عشرات العصافير بنجاح لأن ضروري
يتأقلمون على جو البيت اذا نبغي نتجنب المشاكل.
ملاحظة: كل ما تشتري عصافير جديدة
حطهم في قفص صغير معزول و عيد الخطوات اللي فوق قبل لا تخلطهم
مع بقية عصافيرك.
ثالثاً -
الإضاءة...بما اننا مضطرين نربي الطيور داخل البيت بعيد عن الشمس و حرارة الجو,
لازم نوفر اضاءة مناسبة لأن أجسام طيور الفينج ما تمتص الكالسيوم
بدون اشعة شمس و حتى الوان الريش تصير باهتة اذا ما توفرت انارة
قوية - النور اللي يدخل عن طريق الشبابيك المغلقة ما يكفي لأن الزجاج
يحجب دخول الاشعة فوق البنفسجية اللي يحتاجها الطير و بنفس
الوقت ما نقدر نفتح الشباك لأن بيدخل هواء حار و بيتغير الجو فجأة.
الحل هو استخدام الـfluorescent light اللي ممكن نشتريه من محلات
أسماك الزينة و يستخدم للنباتات المائية. و بعد ممكن نستخدم الإضاءة
المخصصة للزواحف لأنها تحتوى على اشعة فوق البنفسجية. لا تستخدم
لمبة او تيوب ليت عادي لأن وجوده ما له تأثير ايجابي على الفينج.
[url=https://2img.net/r/ihimizer/img372/3121/light1id5.jpg][/url]
توقيت تشغيل و اطفاء الاضاءة له تأثير مهم على انتاج الطيور و صحتها, اذا
كانت الاضاءة شغالة طول الليل فالطيور بتحس بتعب و ما بتنتج بشكل
جيد لكن لو كانت الاضاءة تنطفئ و تفتح مع غروب و شروق الشمس
بتكون النتائج أفضل.
شخصياً استخدم automatic timer يفتح و يطفي الاضاءة بشكل
اوتوماتيكي و هذا موجود عند اغلب الكهربائيين, صورة للمنتج:
[url=https://2img.net/r/ihimizer/img391/2127/lightpe0.jpg][/url]
كل ما عليك انك توصل واير الاضاءة في الـtimer و تحدد توقيت التشغيل و
بهالشكل تضمن ان الاضاءة بتشتغل و بتفتح يومياً حسب التوقيت المحدد.
رابعاً -
الأكل المناسب و بعض الإضافات المهمة...انواع الأكل متوفر بكثرة في المحلات و انا جربت منهم الكثير و حتى
جربت استورد انواع خاصة من الخارج و اتابع شو اللي وراه فائدة اكثر و
بصراحة أفضل خلطة جربتها هية ماركة Trill لطائر الحسون لسببين...
اولاً متوفر في جميع الجمعيات و سعره رخيص...
ثانياً يحتوى على كل العناصر الاساسية من فيتامينات
(11 فيتامين) و كالسيوم (عن طريق خلط الصدف المجروش) و العصافير
يتقبلونه بسهولة.
بجانب خلطة Trill, لازم نوفر لهم الـCuttlebone لأن فيه املاح و كالسيوم
تحتاجه الطيور و بعد جيد للمنقاب, بدونه بتلاحظون ان المنقاب متقشر و
شكله جاف:
[url=https://2img.net/r/ihimizer/img187/5687/cuttlebonevn5.jpg][/url]
اذا كنت تريد تشجع الطيور على الانتاج (خصوصاً الصعب منها مثل
الجولديان و الستار و الكوردن بلو) فلازم توفر انواع اضافية من الأكل, هذي
الاضافات عليك تستمر بتقديمها من قبل وضع البيض لين ما يتبدل ريش الصغار اذا كنت حاب تضمن انتاج قوي.
[url=https://2img.net/r/ihimizer/img376/8423/food1wi4.jpg][/url]
عن نفسي اضيف الـmillet و هو متوفر في محلات الطيور. بعد اوفر البيض
المطبوخ (ينفرم مع القشر و يتقدم فريش) و احياناً نفرم بعض الخضروات
مثل الخس و الجزر و الخيار و لازم طبعاً هالاشياء تتقدم فريش و نشل
المتبقي منها بعد 5 ساعات لانها تخترب و ما تصلح للأكل.
[url=https://2img.net/r/ihimizer/img519/7549/wormrr0.jpg][/url]
بعض انواع الفينج مثل الستار و الكوردن بلو و البوم (owl) يحب انواع
معينة من الحشرات و الدود في مواسم التزاوج لكن للأسف ما لقيت
مصدر في الامارات يبيع هالحشرات بس قرأت تجارب لمربين قدروا
ينتجونهم بدون اضافة حشرات لغذائها.
خامساً -
نصائح أخيرة...الماء اللي نوفره للعصافير لازم يتبدل كل يوم خصوصاً لو العصافير حبت
تغتسل فيه لأن المياه لو توسخت تتولد فيها البكتيريا بسرعة و ممكن
تسبب امراض لو تركناها لأكثر من يوم.
أرضية القفص ممكن نحط عليها جريدة و نبدلها كل يومين او كل ثلاثة ايام
حسب عدد العصافير. لو عندك بس عصفورين ممكن ما تحتاج تبدل اسبوع
لكن لو 6 عصافير بيتطلب تبديل شبه يومي.
طيور الفينج حساسة لدرجة ان الصدمة ممكن توصله للموت, فلو عندك
اطفال مزعجين في البيت لازم تحط الأقفاص بمكان عالي ما يقدرون
يوصلون له, و اذا كان عندك قطط فما في مفر منهم الا اذا كانت الأقفاص
في غرفة دايماً مغلقة.
اذا حبيت تربي اكثر من نوع بنفس القفص ضروري تسأل في المنتدى او
تبحث لو كانت هذي الأنواع متوافقة مع بعض او لا - راعي المحل بيقولك
متوافقة لكن كلامه خالي من الصحة و بعد كم شهر هذي بتكون النتيجة:
[url=https://2img.net/r/ihimizer/img253/2560/plucking2qz2.jpg][/url]
بما ان
الزيبرا هو النوع المفضل عند المبتدئين, احب اوضح ان الأفضل
تختار ذكر واحد للقفص الصغير (عرض 65 سم) او اكثر من ثلاث ذكور لو
عندك قفص كبير, بينما لو كانوا ذكرين في نفس القفص فعند فترة التزاوج
كل واحد بيحاول يتخلص من الثاني و نفس المشكلة موجودة مع الـ
Shaft-tail finch, لذلك لو حاب 4 من طيور
الزيبرا يفضل انك تختار 4 ذكور و
اذا تود الانتاج يفضل تبدأ بجوز واحد فقط او تشتري قفص لكل جوز.
و أخيراً, تذكر ان طائر الفينج هو طائر ما يستقر الا اذا حس بالأمان, فلا
تنقل مكانه الا لو كنت مضطر و لا تدخل ايدك في القفص غير وقت ما
تحتاج تبديل الماي او اضافة اكل او اخراج عصفور مريض.
اذا كنت تبغي طائر تقترب منه فنصيحة مني اختار اي من العصافير اللي
تنتمي لفصيلة الببغاوات بدل من الفينج.
+ + + + + + + + + + + +
أتمنى اكون أفدتكم بهذي المعلومات و اللي عنده أي استفسار يسأل و
ان شاء الله بيلقى جوابه بأقرب فرصة.